សៀមរាប៖ក្រុមការងាររដ្ឋលេខាធិការដ្ឋានអាកាសចរណ៍ស៊ីវិល ដឹកនាំដោយលោក ម៉ៅ ហាសវណ្ណាល់ រដ្ឋមន្ដ្រីទទួលបន្ទុករដ្ឋលេខាធិ ការដ្ឋានអាកាសចរណ៍ស៊ីវិលបានចុះពិនិត្យសមិទ្ធិផលមួយចំនួននៃព្រលានអន្ដរជាតិថ្មីនៅខេត្ដសៀមរាបកាលពីពាក់កណ្តាលសប្តាហ៍ឆ្នាំ២០២២។
ព្រលានយន្ដហោះអន្ដរជាតិនៅក្នុងទឹកដីស្រុកសូទ្រនិគម ខេត្ដសៀមរាប ដែលកំពុងសាងសង់ថ្មីនោះគឺបានសំរេចប្រហែល៤២ភាគរយហើយក្នុងចំណោម សមិទ្ធិផលទាំងអស់។
រដ្ឋលេខាធិការរដ្ឋានប្រចាំការអាកាសចរណ៍ស៊ីវិល លោក ជា អូន មានប្រសាសន៍ថា ក្រុមការងាររដ្ឋលេខាធិការដ្ឋានអាកាសចរណ៍ស៊ីវិល ដែលចុះមកពេលនេះ គឺដើម្បីត្រួតពិនិត្យបច្ចេកទេស ទៅលើឃ្លាំងសាំងយន្ដហោះ ផ្លូវរត់របស់យន្ដហោះ កន្លែងបំពាក់ឧបករណ៍នាំផ្លូវយន្ដហោះចុះចត កន្លែងបំពាក់ឧបករណ៍នាំផ្លូវហោះពីចំងាយ និងពិនិត្យមើលអគារកុងត្រូលដែលមានកំពស់១៧៦ម៉ែត្រស្មើ១៣ជាន់ ដើម្បីឱ្យប្រាកដថារាល់ការបំពាក់ឧបរណ៍ទាំងនេះធ្វើឡើងបានត្រឹមត្រូវតាមស្ដង់ដារអាកាសចរណ៍កម្ពុជាផង និងអន្ដរជាតិផង។
ក្រៅពីចុះពិនិត្យការបំពាក់ឧបករណ៍នានាសម្រាប់ ផ្លូវយន្តហោះក្រុមការងារក៏បានពិនិត្យមើលកន្លែងបំពាក់រ៉ាដាសម្រាប់មើលយន្ដហោះឆ្លងកាត់ប្រទេសកម្ពុជា ពិនិត្យមើលការសាងសង់សំណង់ និងនៅកន្លែងការដ្ឋានផ្សេងៗទៀតដែរ។
មន្ត្រីជាន់ខ្ពស់រដ្ឋលេខាធិការដ្ឋានអាកាសចរណ៍ស៊ីវិល ឱ្យដឹងថា នៅដំណាច់ឆ្នាំ២០២២នេះ ក្រុមហ៊ុននឹងសាងសង់ព្រលានយន្តហោះអន្តរជាតិថ្មី ឱ្យសម្រេចបានជាង៧០ភាគរយបន្ថែមទៀត ដើម្បីឱ្យទាន់ការហោះហើរសាកល្បងនៅពាក់កណ្ដាលឆ្នាំ២០២៣។
ពេលបច្ចុប្បន្ននេះ សមិទ្ធិផលដែលសម្រេចបានរួចហើយមានដូចជា ផ្លូវរត់របស់យន្ដហោះជាបេតុងប្រវែង៣៦០០ម៉ែត្រឃ្លាំងប្រេងសម្រាប់ផ្គត់ផ្គង់យន្ដហោះ ដែលទំនើបជាងព្រលានយន្ដហោះដទៃទៀតមាន៣៨ចំណត។ ជាមួយគ្នានោះ ក្រុមការងារកំពុងរៀបចំឯកសារបច្ចេកទេសមួយចំនួន ដូចជា អាយតាកូដ និងអាយខេអូកូដ ដើម្បីដាក់ពាក្យស្នើរសុំបានកូដពីអង្គការអាកាសចរណ៍ស៊ីវិលអន្ដរជាតិ ឯកសារនោះមានជាងមួយរយចំណុចដែលត្រូវបំពេញទាំងក្រុមហ៊ុននិងអាកាសចរណ៍ស៊ីវិល។
ដំណើរការសាងសង់អាកាសយានដ្ឋានអន្តរជាតិថ្មីនៅខេត្តសៀមរាប បានចាប់ផ្ដើមបើកការដ្ឋាន កាលពីពាក់កណ្តាលខែមីនាឆ្នាំ២០២០ ហើយគ្រោងនឹងបញ្ចប់នៅឆ្នាំ២០២៣ គឺមានរយ:ពេលសរុប៣៦ខែ។អាកាសយានដ្ឋានថ្មីនេះ ស្ថិតក្នុងលំដាប់4E មានផ្លូវរត់ប្រវែង៣,៦០០ម៉ែត្រទទឹង៤៥ម៉ែត្រមាន៣៨ចំណតយន្តហោះនិងមានក្រឡាផ្ទៃស្ថានីយសម្រាប់ទទួលអ្នកដំណើរជាង៨ម៉ឺនម៉ែត្រក្រឡាដែលអាចទទួលភ្ញៀវជាប្រចាំឆ្នាំប្រមាណជា ៧លាននាក់។ អាកាសយានដ្ឋានអន្តរជាតិខ្នាតដ៏ធំមួយនេះគឺស្ថិតក្រោមកិច្ចព្រមព្រៀង គម្រោងវិនិយោគ BOT រយ:ពេល៥៥ឆ្នាំ៕